Në Pejë po raportohet për punësime masive të aktivistëve dhe zyrtarëve të Lëvizjes Vetëvendosje në ndërmarrjen publike “Hidrodrini”. Vetëm gjatë vitit 2023, mbi 30 persona të lidhur me këtë parti, përfshirë edhe familjarë të tyre, janë sistemuar në pozita të ndryshme – nga financat e deri te mirëmbajtja.
Një nga emrat kryesorë është Besnik Zeqiri, Sekretar i Degës së Vetëvendosjes në Pejë dhe kandidat për asamblist në zgjedhjet e 12 tetorit, i cili më 3 korrik 2023 u emërua zyrtar kryesor financiar i Ujësjellësit.
Pas tij, më 11 janar 2024, në këtë ndërmarrje u punësua si mikrobiolog Shpat Taraku, gjithashtu nga Vetëvendosje. Në laborator u sistemua edhe Nita Lleshi, e cila mori pozitën më 6 nëntor 2023.
Dita më e madhe e punësimeve rezultoi të ishte 1 gushti 2023, kur u pranuan tetë aktivistë të VV-së në një ditë të vetme, shumica si inkasantë. Në mesin e tyre ishte Ahmet Sinanaj, aktivist i vjetër nga Deçani, ndërsa bashkëpartiaku i tij Enver Gashi filloi punën dy javë më vonë, më 15 gusht 2023.
Raportimet tregojnë se ky nuk është një rast i izoluar, por pjesë e një praktike më të gjerë të punësimeve partiake në ndërmarrjet publike./Klan.
