Granit Xhaka po fiton me shpejtësi zemrat e tifozëve të Sunderlandit pas transferimit të tij gjatë afatit kalimtar të verës. Paraqitjet e tij të qëndrueshme dhe lidershipi në fushë kanë bërë që mesfushori shqiptar të vlerësohet jashtëzakonisht shumë nga adhuruesit e klubit anglez.
Një prej tifozëve të zjarrtë të Sunderlandit ka ndarë në rrjetet sociale një koment që po bën xhiron e mediave britanike. Ai e ka cilësuar Xhakën si futbollistin më të mirë që ka parë të veshë fanellën e klubit në jetën e tij.
“Jam 35 vjeç dhe e ndjek Sunderlandin që kur isha rreth 8 vjeç. Sinqerisht, mendoj se Granit Xhaka është lojtari më i mirë që ka luajtur për klubin gjatë gjithë kësaj kohe,” – ka shkruar tifozi.
Ky reagim është vetëm një ndër shumë të tjerë që shprehin respektin dhe adhurimin ndaj 32-vjeçarit shqiptar. Xhaka, me përvojën e tij të madhe dhe ndikimin në mesfushë, duket se është shndërruar shpejt në një nga figurat më të dashura për tifozët e Sunderlandit.
