CEO i Apple, Tim Cook, ka mbajtur një takim të brendshëm me të gjithë punonjësit, që zgjati rreth një orë, ku u ka thënë atyre se kompania duhet të fitojë në fushën e inteligjencës artificiale (AI), sipas një raporti të Mark Gurman nga Bloomberg.
Ky takim u mbajt pas një konference për fitimet e kompanisë, në të cilën Cook i kishte thënë investitorëve dhe analistëve se Apple do të rrisë ndjeshëm investimet në AI. Ai duket se dha një mesazh të ngjashëm edhe për punonjësit e kompanisë, duke u thënë:
“Apple duhet ta bëjë këtë. Apple do ta bëjë këtë. Kjo është diçka që na takon ne.”
Megjithëse Apple ka prezantuar një sërë veçorish të fuqizuara nga AI gjatë vitit të fundit nën emrin Apple Intelligence, përmirësimet e premtuara për asistentin zanor Siri janë vonuar dukshëm. Cook, gjithashtu, duket se e ka pranuar se kompania ka mbetur prapa krahasuar me konkurrentët.
“Rrallëherë kemi qenë të parët,” thuhet se ka deklaruar ai. “Ka pasur kompjuterë personalë para Mac-ut; ka pasur telefona të mençur para iPhone-it; ka pasur shumë tabletë para iPad-it; dhe ka pasur MP3 player-a para iPod-it.” Por sipas tij, kjo nuk e ka penguar Apple të shpikë versionet “moderne” të këtyre produkteve.
