15 tetor 2025 | Tiranë – Kryetari i Organizatës së Veteranëve të Luftës së Ushtrisë Çlirimtare të Kosovës (OVL-UÇK), Hysni Gucati, ka konfirmuar zhvillimin e një proteste gjithëkombëtare më 17 tetor në Tiranë, në mbështetje të ish-krerëve të UÇK-së që po mbahen në paraburgim në Hagë.
Në një intervistë për Report TV, Gucati deklaroi se protesta do të jetë paqësore dhe mbarëkombëtare, me pjesëmarrës nga të gjitha trevat shqiptare. Ai tha se fjalimet kryesore do të mbahen nga ish-presidenti i Shqipërisë Alfred Moisiu, kryetari i BDI-së Ali Ahmeti, vetë Gucati, si dhe një familjar i një dëshmori shqiptar që ka rënë në Kosovë.
“Kemi vendosur që më 17 tetor të zhvillohet një protestë paqësore, aty ku e ka gjenezën UÇK-ja, në Tiranë. Do të jetë një numër i madh pjesëmarrësish nga të gjitha trevat shqiptare. Dua të falënderoj shtetin shqiptar për mbështetjen e dhënë,” – tha Gucati.
Ai theksoi se protesta nuk ka karakter politik, por kombëtar, dhe synon të kërkojë drejtësi të mirëfilltë dhe jo politike për ish-krerët e UÇK-së – Hashim Thaçin, Kadri Veselin, Jakup Krasniqin dhe Rexhep Selimin, të cilët ndodhen në paraburgim në Hagë që prej vitit 2020.
Sipas tij, është e mundur që në protestë të marrë pjesë edhe kryeministri Edi Rama, ndërsa nga Partia Demokratike pritet ende një përgjigje zyrtare.
“Me siguri nëse Rama do të jetë në Tiranë, do të marrë pjesë. Kam dërguar shkresë edhe në PD dhe pres përgjigje sot. Kjo protestë nuk është e një partie, por e gjithë kombit. Sa më shumë qytetarë të jenë të pranishëm, aq më fort do të dëgjohet zëri ynë në botë,” – u shpreh Gucati.
Ai shtoi se nga Kosova pritet të nisen mbi 60 autobusë me qytetarë për të marrë pjesë në tubimin që do të mbahet në kryeqytetin shqiptar, duke theksuar se qëllimi i vetëm është kërkesa për drejtësi të drejtë për luftën e UÇK-së dhe figurat e saj udhëheqëse.
