U munduan ta rrëmbenin të gjallë, vritet nga Hamasi ushtari izraelit që po drejtonte një ekskavator në Gaza

Një ushtar izraelit u vra gjatë përpjekjeve të anëtarëve të Hamasit për ta rrëmbyer atë në pjesën jugore të Rripit të Gazës. Militantët më pas u munduan ta merrnin edhe kufomën e tij, por u sprapsën nga trupat izraelite, tha të mërkurën ushtria e Izraelit.

Më vonë, ushtari i vrarë u identifikua si Abraham Azulay, 25 vjeç. Ai ishte pjesëtar i forcave rezervë, operues i makinerisë së rëndë në njësitin luftarak të inxhinierisë në Komandën Jugore. Ushtari vinte nga vendbanimi Yitzhar i Bregut Perëndimor, raporton gazeta “The Times of Israel”.

Azulay ishte martuar vetëm para tre muajve dhe pas vetes i ka lënë bashkëshorten Ruth, prindërit, vëllezërit e motrat.

Sipas një hetimi të ushtrisë izraelite që është duke vazhduar, disa anëtarë të armatosur të Hamasit dolën nga një tunel dhe i sulmuan trupat izraelite në qytetin jugor të Gazës, Khan Younis.

Gjatë sulmit, militantët e armatosur u përpoqën që ta rrëmbenin ushtarin Azulay, i cili kishte qenë duke drejtuar një ekskavator.

Ai “u ballafaqua me ta dhe terroristët e qëlluan dhe e vranë” – tha ushtria izraelite.

Anëtarët e Hamasit më pas u munduan që të largoheshin bashkë me kufomën e ushtarit të vrarë, por ushtarë të tjerë izraelitë që po e ruanin zonën hapën zjarr në drejtim të tyre, duke i sprapsur nga përpjekja, sipas ushtrisë izraelite.

Më herët të mërkurën, krahu ushtarak i Hamasit njoftoi se pjesëtarët e armatosur të tij ishin përpjekur që të kapnin një ushtar në pjesën lindore të qytetit Khan Younis, por se “kushtet në terren nuk lejuan një gjë të tillë, prandaj ata e vranë atë dhe ia konfiskuan armën”.

Që nga fillimi i luftës në Gaza e deri më 3 mars 2024, Azulay kishte shërbyer për 66 ditë në forcat rezervë, për ç’gjë u gradua rreshter i klasës së parë.

Azulay ishte ndëshkuar më pas për shkak të dezertimit në forcat rezervë, duke u burgosur dhe duke e degraduar në ushtar të thjeshtë.

Pas ndëshkimit, ai ishte kthyer në forcat rezervë dhe kishte shërbyer edhe për 201 ditë të tjera./Nacionale