Tre profesorë të Universitetit “Haxhi Zeka” në Pejë, Hajrija Shkrijelj, Valdrin Misiri dhe Berat Aqifi, kanë ngritur padi kundër institucionit, duke e cilësuar si të paligjshëm dhe të motivuar politikisht vendimin e Këshillit Drejtues për anulimin e zgjedhjes së katër anëtarëve të rinj të këtij këshilli.
Sipas padisë, në mbledhjen e Senatit të datës 1 korrik, profesorët Shkrijelj, Misiri, Arsim Kelmendi dhe Berat Aqifi u zgjodhën anëtarë të Këshillit Drejtues me mandat tre-vjeçar. Por, vetëm një ditë më pas, Këshilli Drejtues, i kryesuar nga Emine Abdyli-Pozhari, vendosi ta shfuqizojë zgjedhjen, duke argumentuar se anëtarët u zgjodhën nga përbërja e re e Senatit, mandati i të cilit fillon më 1 tetor, me nisjen e vitit të ri akademik.
Paditësit theksojnë se Këshilli Drejtues nuk ka kompetenca për të anuluar vendimet e Senatit dhe se vendimi u mor pa kuorumin e nevojshëm. Ata shtojnë se zgjedhjet u organizuan nga Komisioni Qendror Zgjedhor i universitetit, i cili konfirmoi mbarëvajtjen e procesit. Sipas profesorëve, vendimi i kryesueses Abdyli-Pozhari, i marrë me vetëm tre vota dhe me përfshirjen e anëtarëve me konflikt interesi, përbën tejkalim të kompetencave dhe keqpërdorim të detyrës zyrtare.
Në një përgjigje për KOHËN, kryesuesja e Këshillit Drejtues, Emine Abdyli-Pozhari, mohoi akuzat për tejkalim kompetencash, duke thënë se vendimi u mor për të garantuar ligjshmërinë, bazuar në Statutin e universitetit dhe opinionin e Ministrisë së Arsimit, Shkencës, Teknologjisë dhe Inovacionit (MASHTI). Ajo sqaroi se në mbledhjen e 2 korrikut morën pjesë tetë nga nëntë anëtarët e Këshillit, ku katër anëtarë votuan për anulimin, duke përmbushur minimumin e kërkuar për vendimmarrje.
Megjithatë, profesori Valdrin Misiri e cilësoi vendimin si “qartësisht të paligjshëm” dhe në kundërshtim me statutin e universitetit. “Kryesuesja Abdyli-Pozhari ka shfuqizuar pa të drejtë dhe pa rend dite vendimin për zgjedhjen e anëtarëve të rinj të Këshillit Drejtues dhe komisionin profesional për zgjedhjen e rektorit. Me vetëm tre vota nga shtatë anëtarë dhe kjo vërtetohet nga proceverbali i mbledhejes së KD-së, ky veprim shkel autonominë institucionale dhe vullnetin e organeve zgjedhore. Znj. Abdyli duhet të japë llogari për këto veprime,” tha Misiri.
MASHTI, përmes një deklarate, konfirmoi se opinioni ligjor, në të cilin thirret Abdyli-Pozhari, u lëshua më 15 korrik, 13 ditë pas vendimit të Këshillit Drejtues. Çështja tashmë është në gjykatë, ku pritet të shqyrtohet ligjshmëria e veprimeve të Këshillit Drejtues.
Burimi: KOHËN
