Universiteti “Haxhi Zeka” në Pejë është nderuar me Certifikatën e Cilësisë nga Agjencia Kosovare e Akreditimit (AKA), një nga vlerësimet më të rëndësishme për institucionet e arsimit të lartë në Kosovë.
Certifikata u nda në fund të muajit shtator 2025, në një ceremoni solemne, si vlerësim për përmbushjen e standardeve të larta të sigurimit të cilësisë dhe për arritjet e universitetit në disa fusha kyçe strategjike. Vlerësimi përfshin ndërkombëtarizimin e universitetit, zhvillimin e programeve të studimeve doktorale (PhD) si dhe përmirësimin e pozitës së UHZ-së në rangimet ndërkombëtare.
Sipas përfaqësuesve institucionalë, ky vlerësim nuk përfaqëson vetëm një certifikim formal, por është rezultat i një procesi të gjatë reformash dhe investimesh në cilësinë akademike, infrastrukturë, hulumtim shkencor dhe bashkëpunime ndërkombëtare.
Universiteti “Haxhi Zeka” ka shënuar progres të dukshëm drejt konceptit të universitetit modern dhe konkurrues, duke synuar modelin e ashtuquajtur “Universiteti 4.0”, ku arsimi, hulumtimi dhe inovacioni lidhen drejtpërdrejt me zhvillimin shoqëror dhe ekonomik.
Studentët dhe stafi akademik e administrativ e kanë cilësuar këtë certifikatë si një motiv shtesë për avancim të mëtejmë, duke theksuar se njohja nga AKA forcon besueshmërinë e diplomave dhe rrit dukshmërinë ndërkombëtare të universitetit.
Nga UHZ bëhet e ditur se kjo arritje është një hap i rëndësishëm drejt konsolidimit të universitetit si një qendër e rëndësishme e dijes në Kosovë dhe rajon, ndërsa angazhimi për përmirësim të vazhdueshëm të cilësisë do të mbetet prioritet edhe në vitet në vijim.
Certifikata e Cilësisë vlerësohet si një sukses institucional që e pozicionon Universitetin “Haxhi Zeka” në hartën e arsimit të lartë me standarde ndërkombëtare./Qendra.INFO
