Deputeti i Partisë Demokratike të Kosovës, Përparim Gruda, ka reaguar ashpër ndaj vendimit të Gjykatës Supreme, duke deklaruar se mbajtja e njëkohshme e funksionit të ministrit dhe deputetit përbën shkelje të ligjit dhe vepër penale. Ai i ka bërë thirrje Prokurorisë së Shtetit të ndërmarrë veprime konkrete për zbatimin e aktgjykimit të Supremes.
Në një konferencë për media, Gruda tha se vendimi i djeshëm i Supremes, i bazuar në Ligjin për Qeverinë, ka konfirmuar se ushtrimi i dy funksioneve nga anëtarët e kabinetit qeveritar është i kundërligjshëm dhe jokushtetues.
“Ky vendim nuk vlen vetëm për ministrin Hekuran Murati, por për të gjithë ministrat dhe vetë kryeministrin në detyrë, Albin Kurti, të cilët aktualisht janë edhe deputetë në Kuvendin e Kosovës,” deklaroi Gruda.
Sipas tij, çdo ditë që këta zyrtarë publikë vazhdojnë të mbajnë të dy pozitat, përbën shkelje penale për moszbatim të një vendimi gjyqësor. Ai i kërkoi Kurtit dhe ministrave të respektojnë vendimin dhe të lënë menjëherë postet ekzekutive, duke i deleguar ato te zëvendësit e tyre.
Gruda paralajmëroi se sulmet ndaj gjyqësorit nga përfaqësues të qeverisë janë të papranueshme, ndërsa theksoi se Kosova ka nevojë për sundim të ligjit dhe jo për njerëz mbi ligjin.
Reagim edhe ndaj vendimit të Speciales për Thaçin dhe të tjerët
Në të njëjtën konferencë, Gruda reagoi edhe ndaj vendimit të Dhomave të Specializuara në Hagë, që të mos pranohet mocioni për rrëzimin e një pjese të aktakuzës ndaj ish-presidentit Hashim Thaçi, Kadri Veselit, Jakup Krasniqit dhe Rexhep Selimit.
“Ky është një rast i humbur për drejtësinë ndërkombëtare. Mungesa e pranimit të kërkesave të mbrojtjes dhe mënyra se si po zhvillohet procesi janë shqetësuese,” tha Gruda.
Ai akuzoi gjykatën dhe prokurorinë se po veprojnë si “një trup i vetëm”, duke mos garantuar trajtim të barabartë për mbrojtjen.
Megjithatë, Gruda u shpreh i bindur se e vërteta do të dalë në dritë:
“Ata janë të pafajshëm. Ata janë çlirimtarë. Ne presim me besim të plotë vendimin përfundimtar për lirimin e tyre të përhershëm.”
Thirrje për respektim të Kushtetutës dhe drejtësisë
PDK, përmes deputetit Gruda, ka kërkuar respektim të Kushtetutës, zbatimin e vendimeve të gjykatave dhe ruajtjen e integritetit të institucioneve të drejtësisë, si bazë për funksionimin demokratik të shtetit.
