Të enjtën u mbajt seanca e radhës për konstituimin e Kuvendit, ku edhe në këtë seancë nuk u arrit të zgjedhet nënkryetari nga komuniteti serb, ndërsa seanca u shtye për të shtunën e 30 gushtit, shkruan Gazeta Metro.
Edhe kjo seancë siç rëndom ka ndodhur, nisi me vonesë rreth 40 minuta, ndërkaq përzgjedhja e kandidatëve u bë përmes shortit, por pavarësisht shumë tentimeve, nuk u arrit që të votohej nënkryetari i pestë.
I pari që provoi fatin ishte Branislav Nikoliq, i cili nuk mori asnjë votë. Pas tij, edhe bashkë partiaku Zlatan Elek, ndonëse u votua tri herë, dështoi të zgjidhej. Pa sukses mbetën edhe Stefan Kovaçeviq, Sërxhan Popoviq dhe Igor Simiq.
Edhe kandidati i preferuar i kryeministrit Kurti, Nenad Rashiq, nuk arriti të marrë votat e nevojshme. Për të ishin pro 56 deputetë, ndërsa me dështimin e Rashiqit kryesuesi i seancës, Dimal Basha e ndërpreu seancën me arsyetimin se Rashiq mund t’i marrë votat në një seancë tjetër.
Pas mbylljes së seancës pati deklarime nga pozita e opozita.
Kryetari i PDK-së, Memli Krasniqi, kritikoi Lëvizjen Vetëvendosje për angazhimin e madh rreth Rashiqit, duke thënë se PDK ka abstenuar pasi procesi është “i paqëndrueshëm nga pikëpamja kushtetuese”.
Igor Simiq nga Lista Serbe paralajmëroi ankesë në Gjykatën Kushtetuese, duke e cilësuar shortin për nënkryetar si antikushtetues.
Të kundërtën e Simiq, e tha pretendenti për tu ulur në karriken e nënkryetarit Nenad Rashiq, ku sipas tij votimi për ta vendosur atë në këtë pozitë nuk është antikushtetues.
Deputeti i VV-së, Hekuran Murati, pyeti: “Nëse jo Rashiq, kush nga pakica serbe duhet të zgjidhet nënkryetar Kuvendi?”. Ai tha se VV ka qenë konsistente në refuzimin e kandidatëve të Listës Serbe, ndërsa Rashiqin e sheh si ndryshe, pasi ai e njeh shtetin dhe institucionet e Kosovës.
Pa zgjedhjen e nënkryetarit serb, Kuvendi mbetet në ngërç, ndërsa të gjithë sytë janë drejt seancës së ardhshme për të vendosur për këtë post kyç./gazetametro.net
