Burime nga terreni dhe pamje të publikuara në rrjete sociale tregojnë se vëllai i presidentit të Serbisë, Andrej Vuçiq, është parë mbrëmë në qendër të Beogradit, në afërsi të vendit ku ndodhën përplasjet mes policisë, grupeve proqeveritare dhe studentëve protestues.
Sipas dëshmitarëve, Andrej Vuçiq është parë duke u afruar pranë një grupi simpatizantësh të Partisë Përparimtare Serbe (SNS), të cilët më vonë u përplasën me protestuesit. Nuk ka ende informacion zyrtar për rolin e tij në ngjarje, por prania e tij ka ngjallur reagime të forta në opinionin publik dhe në qarqet opozitare.
Protestat studentore, që prej disa ditësh zhvillohen në Beograd dhe qytete të tjera, kulmuan mbrëmë me incidente të rënda. Policia përdori gaz lotsjellës për të shpërndarë turmën, ndërsa dhjetëra persona u lënduan, përfshirë edhe gazetarë.
Opozita ka kërkuar hetim të menjëhershëm mbi incidentet dhe rolin e mundshëm të zyrtarëve dhe të afërmve të presidentit Vuçiq në nxitjen e dhunës kundër protestuesve.\Qendra.INFO
