Kreu i PDK’së, Memli Krasniqi, ka thënë se Gjykata Kushtetuese me vendimin e sotëm vërtetoi se “Lëvizja Vetëvendosje e ka mbajtur peng Kuvendin”.
Sipas Krasniqit, ky është konfirmim i plotë se “bllokada, shkeljet dhe veprimet arbitrare të Lëvizjes Vetëvendosje” ishin jo vetëm antikushtetuese, por edhe thellësisht të dëmshme për demokracinë dhe shtetin.
“Kosova nuk mund të ecë përpara me institucione të paralizuara dhe me rregulla të shkelura sipas tekave të pushtetit. Prandaj, le të jetë ky një mësim i qartë për të gjithë, e veçanërisht për ata që nuk kanë ditur kurrë ta respektojnë shtetin: Kosova ka nevojë për institucione funksionale dhe për lidership që respekton rregullat, jo që i shkel ato për pushtet. Ne do të jemi gjithmonë në anën e Kushtetutës dhe të qytetarëve”, ka shkruar Krasniqi.
Ai e ka quajtur këtë fitore për rendin kushtetutes, për Kuvendin dhe për qytetarët e Republikës së Kosovës.
“Ata që zgjodhën krizën, dështuan. Ne që zgjodhëm Kushtetutën, fituam”, përfundon postimi i Krasniqit./Reporteri.net
