Këtë javë, Instagram prezantoi një funksion të ri të quajtur Instagram Map, i ngjashëm me Snap Map, që u lejon përdoruesve në SHBA të ndajnë vendndodhjen e tyre të fundit aktive me të tjerët dhe të zbulojnë përmbajtje të bazuar në lokacion.
Nëse vendosni ta aktivizoni ndarjen e lokacionit në Instagram Map, lokacioni juaj përditësohet vetëm kur hapni aplikacionin ose kur ai është duke punuar në sfond, që do të thotë se nuk përditësohet në kohë reale. Kjo e dallon nga Snap Map, ku përdoruesit mund të zgjedhin nëse vendndodhja përditësohet vetëm kur hapin aplikacionin apo në kohë reale.
Meta thotë se ndarja e lokacionit është e çaktivizuar nga parazgjedhja në Instagram Map. Përballë shqetësimeve të përdoruesve për sigurinë, drejtuesi i Instagramit, Adam Mosseri, siguroi përdoruesit se funksioni është opsional dhe theksoi se disa njerëz janë të “konfuzuar” se si funksionon ky opsion.
Për shembull, disa përdorues po e aksesojnë hartën dhe po shohin lokacione të personave të tjerë. Kjo ndodh sepse funksioni e tërheq automatikisht informacionin e vendndodhjes nga Story apo Reels që kanë qenë të shoqëruara me “location tag” së fundmi.
Vlen të theksohet se kjo nuk është diçka e re – Instagram tashmë kishte etiketa të lokacionit në pamjen me hartë – por funksioni i ri e bën shumë më të lehtë qasjen në këto informacione. Prandaj, ndoshta është momenti të mendoni mirë nëse doni ta ndani një Story apo Reel me lokacionin aktiv, sidomos nëse ndodheni ende në atë vend.
Si të aksesoni Instagram Map
Për ta hapur këtë funksion, shkoni në faqen e mesazheve (DMs) dhe prekni opsionin “Map” në pjesën e sipërme. Nëse është hera juaj e parë që e përdorni, do të shfaqet një dritare informuese.
Kjo do t’ju informojë se askush nuk mund ta shohë lokacionin tuaj derisa ta ndani me ta, dhe se mund t’i ndryshoni preferencat në çdo kohë.
Si të vendosni preferencat për ndarjen e lokacionit
Herën e parë që hapni Map, do të shihni një faqe me pyetjen: “Kush mund ta shohë vendndodhjen tuaj?”. Ju mund të zgjidhni ta ndani me:
-
Miqtë (përdoruesit që ju i ndiqni dhe ju ndjekin mbrapsht),
-
Listën tuaj të “Close Friends”,
-
Përdorues të veçantë,
-
Apo askënd.
Për të ndryshuar këto preferenca më vonë:
-
Hyni në profilin tuaj,
-
Prekni ikonën e cilësimeve (këndi sipër djathtas),
-
Zgjidhni opsionin “Story, live and location”,
-
Më pas prekni “Location sharing” për t’i përshtatur cilësimet.
Edhe nëse e keni çaktivizuar ndarjen e lokacionit, të tjerët mund të ndajnë lokacionin e tyre me ju, që do të thotë se mund t’i shihni ata në hartë.
Si funksionon Instagram Map në praktikë
Kur hapni aplikacionin, do të shihni vendndodhjet e miqve që e kanë ndarë lokacionin me ju. Po ashtu, do të shihni Story dhe Reels me bazë vendndodhjeje nga njerëzit që i ndiqni.
P.sh., nëse një mik ka qenë në një festival dhe ka postuar një Story, ai do të shfaqet në hartë. Apo nëse një krijues poston një Reel për një restorant në qytetin tuaj, ju mund ta zbuloni përmes Instagram Map.
Edhe nëse nuk e ndani lokacionin tuaj, do të shihni përmbajtje të bazuar në vendndodhje të të tjerëve.
Shënime (“Notes”) në hartë
Instagram gjithashtu ka integruar funksionin “Notes” në Map. Këto janë mesazhe të shkurtra dhe të përkohshme që shfaqen në krye të mesazheve direkte (DMs), por tani mund t’i shihni edhe në hartë nëse ato përfshijnë një lokacion.
