Ndërsa për herë të 48-të radhazi deputetët pritet të mblidhen sot në përpjekje për të konstituuar Kuvendin e ri, para ndërtesës së parlamentit ka protestuar veterani i luftës, Lulzim Prokshi.
Prokshi, i cili kishte udhëtuar nga Drenasi, u paraqit i veshur me uniformën e Ushtrisë Çlirimtare të Kosovës dhe mbante në dorë një pankartë përmes së cilës shprehte pakënaqësinë ndaj bllokadës politike.
Në pankartën e tij shkruhej: “Të largohen uzurpatorët për të mundësuar formimin e institucioneve shtetërore, duke nisur me zgjedhjen e kryetarit të parlamentit e në vazhdim.”
Protesta simbolike e Prokshit vjen në një kohë kur vendi ndodhet në një ngërç institucional prej javësh, pa arritur të konstituohet Kuvendi pas zgjedhjeve të fundit.
Ai u bëri thirrje forcave politike të ndërpresin bllokimin e procesit dhe të lejojnë funksionalizimin e institucioneve shtetërore.
