Në seancën e parë të thirrur nga Kuvendi i Kosovës për buxhetin, po merr pjesë vetëm Lëvizja Vetëvendosje.
Kryetari i Kuvendit të Kosovës, Dimal Basha, ka kërkuar që të mblidhet Kryesia e Kuvendit dhe të formohen komisionet e përhershme.
“Jam i gatshëm ta thërras mbledhjen e kryesisë, dhe të formojmë komisionet e përhershme, në mënyrë që të votohen marrëveshjet ndërkombëtare, buxheti për tri komuna. Çështjet e kësaj seance nuk kanë të bëjë më veprime politike”, tha ai.
PDK, LDK, AAK e Nisma e kanë bojkotuar këtë seancë, duke e akuzuar partinë e Albin Kurtit.
Sekretarja e Përgjithshme e Partisë Demokratike të Kosovës, Vlora Çitaku, ka thënë se kjo seancë është një skemë e radhës e Qeverisë në ikje siç tha ajo për të mbuluar krizën në të cilën po e fusin vendin, si dhe është e paligjshme dhe tërësisht në kundërshtim me rendin kushtetues të Republikës së Kosovës.
Ndërsa deputeti nga radhët e LDK-së, Armend Zemaj, tha se ky është treni i fundit i përpjekjeve manipuluese të Lëvizjes Vetëvendosje.
Teksa Arbëreshë Krasniqi, deputete e Nismës, tha se ky subjket nuk merr pjesë në këtë seancë, pasi sipas tyre është e thirrur jashtë rregullave ligjore.
Analisti politik, Albert Krasniqi, tha dje se seanca e jashtëzakonshme e thirrur për sot vetëm pak orë para seancës për zgjedhjen e Qeverisë “është një seancë e paligjshme dhe në kundërshtim me rendin kushtetues të vendit”.
“Nëse çështjet e renditura në rend dite do të merreshin me seriozitetin që pretendohet sot, vendi nuk do të mbahej i bllokuar për dhjetë muaj me radhë, dhe as do të kalonim nëpër farsën e “përpjekjeve” të rreme për të gjetur marrëveshje me partitë e tjera për formimin e Qeverisë”.
Ai tha se kjo seancë nuk është zgjidhje, por “një manovër politike e pushtetit, të cilës i është bashkuar së fundi edhe Presidentja Osmani, për të zhvendosur fajin te të tjerët për pasojat e rënda financiare me të cilat do të përballet vendi”.
Krasniqi shtoi se thirrjet “për shkelje të qëllimshme të ligjshmërisë” nuk janë as rrugëdalje, as zgjidhje.
