Artisti i njohur shqiptar, Gazmend Freitag, ka paraqitur së fundmi në telajo një portret të Presidentes së Kosovës, Vjosa Osmani, në kuadër të serisë së tij të pikturave kushtuar figurave publike shqiptare.
Në këtë vepër, Osmani paraqitet e vendosur dhe e fuqishme, me një shikim që frymëzon respekt dhe besim. Ngjyrat e qeta dhe kontrasti i butë që Freitag ka përdorur rreth figurës së saj theksojnë qartësinë, autoritetin dhe qetësinë e presidentes, duke e bërë portretin një simbol të lidershipit dhe elegancës.
Gazmend Freitag, me origjinë nga Prizreni, është një piktor shqiptar që jeton dhe vepron në Linz të Austrisë. Pas përfundimit të gjimnazit në Prizren (1987) dhe dy semestrave studimi në Fakultetin Juridik të Prishtinës, ai u zhvendos në Gjermani në vitin 1990. Që nga viti 2004, ai është aktiv në skenën artistike austriake.
Në vitin 2013, Freitag kreu studimet në drejtimin e Nudove në Universitetin e Arteve në Linz, nën udhëheqjen e profesoreshës Annelies Oberdanner. Ai u bë i njohur ndërkombëtarisht pas pjesëmarrjes në Biennalen e parë të Veronës në Itali.
Veprat e tij janë ekspozuar në Vjenë, Linz, Itali, Sllovaki dhe vende të tjera evropiane, ndërsa një nga veprat që ka fituar më shumë vlerësim është “Baresha”, e prezantuar në Biennale, që e konsolidoi pozitën e tij si një prej artistëve shqiptarë më të afirmuar jashtë vendit.
