Ish-ambasadorja e Kosovës në SHBA, Vlora Çitaku, ka reaguar ashpër ndaj bllokadës politike në vend, duke e cilësuar si një krizë me pasoja serioze për qytetarët dhe funksionimin e shtetit. Ajo fajësoi drejtpërdrejt Kryeministrin Albin Kurti dhe ministren Albulena Haxhiu për dështimin e konstituimit të Kuvendit tash e gjashtë muaj pas zgjedhjeve.
“Ne nuk flasim më për 200 mijë pensionistë që mezi i mbulojnë barnat e ushqimin, për mijëra mësues që përballen me sfida ekzistenciale, për policët, ushtarët dhe mjekët. Nuk flasim për sektorin privat me 140 mijë punëtorë që janë në rrezik për shkak të politikave arbitrare, por vetëm për egon e Kurtit dhe ambicien e Haxhiut për karrige,” u shpreh Çitaku për EO.
Ajo theksoi se një situatë e tillë është e paimagjinueshme për një shtet që ka kaluar nëpër luftë dhe ka fituar pavarësinë me përkrahje ndërkombëtare.
Çitaku vuri në dukje edhe përkeqësimin e marrëdhënieve ndërkombëtare, duke përmendur sanksionet e Bashkimit Evropian ndaj Kosovës dhe izolimin në rritje, përfshirë përçarjet me Shqipërinë.
“Sot Kosova nuk është më në tryezën e integrimeve e as në agjendën e njohjeve. Është nën sanksione të BE-së dhe ka tensionuar raportet edhe me Shqipërinë, aleaten më natyrale që kemi pasur ndonjëherë,” përfundoi ajo.
