Për t’u siguruar që fletëvotimet të arrijnë në kohë te votuesit që jetojnë jashtë Kosovës, KQZ-ja ka kontraktuar një operator ekonomik për kryerjen e shërbimeve postare.
E shërbimet postare për votim jashtë vendit nuk është se i kanë kushtuar edhe pak kuletës së shtetit.
Vlera e përgjithshme e kontratës është 268,900.00 euro dhe tenderi i është besuar operatorit ekonomik “3P Sh.P.K”.
KQZ-ja ka sqaruar se, ndonëse shërbime të ngjashme ofrohen nga Posta e Kosovës, kjo e fundit nuk mund të garantojë arritjen e dërgesave në kohë në kontinentet jashtë Evropës (për shkak të kohëzgjatjes prej afërsisht dy javësh) dhe nuk ofron shërbimin e tërheqjes së pakove në shtetet përkatëse. Për këtë arsye, është parë i nevojshëm kontraktimi i një operatori me marrëveshje me kompani ndërkombëtare të postës së shpejtë.

