Edhe mbrëmë, qytetet e Serbisë u përfshinë nga protesta të reja kundër regjimit të Aleksandar Vuçiqit, ndërsa tensionet janë rritur ndjeshëm. Në disa qytete, policia ka përdorur gaz lotsjellës për të shpërndarë turmat e protestuesve, duke shkaktuar kaos dhe panik.
Situata më e rëndë u shënua në Novi Sad, ku protestuesit, pas përplasjes me simpatizantë të pushtetit, demoluan ambientet e Partisë Përparimtare Serbe (SNS). Sipas raportimeve, protestat u zhvilluan edhe në Beograd, Nish, Kragujevac dhe qytete të tjera, me pjesëmarrje të madhe të studentëve, aktivistëve dhe qytetarëve të thjeshtë të pakënaqur me gjendjen në vend.
Kjo është nata e radhës me përshkallëzim dhune dhe shenja të qarta se pakënaqësia popullore po merr përmasa të mëdha. Analistët pohojnë se regjimi i Vuçiqit po përballet me krizën më të rëndë politike që nga ardhja e tij në pushtet, ndërsa rruga drejt një fundi të mundshëm duket se po afrohet me çdo ditë protestash.
