Ish-kryetari i Lëvizjes Serbe të Ripërtëritjes dhe shkrimtari serb Vuk Drashkoviq ka deklaruar se presidenti i Serbisë, Aleksandar Vuçiq, nuk është më ai njeri që dikur e ka mbështetur, duke theksuar se nuk kalon asnjë ditë që kreu i shtetit nuk e shkelë Kushtetutën disa herë.
“Pas vitit 2015 e kuptova që përkushtimi i tij formal ndaj Bashkimit Evropian, ndaj integrimeve evropiane – ishte një manipulim. Që ai në fakt nuk e dëshiron BE-në. Dhe se e vetmja gjë që dëshiron është të marrë mbështetjen e tyre, si financiare, ashtu edhe politike – përmes manipulimeve”, ka thënë Drashkoviqi në një intervistë për të përjavshmen serbe “Nedelnik”.
Ai ka thënë se momenti kur e ka kuptuar që Vuçiqi nuk është ai për të cilin paraqitet ndodhi menjëherë pas kthimit të Sheshelit nga Haga dhe ndërhyrjes së Putinit në Ukrainë dhe pushtimit të pjesëve të Donbasit. Kjo ndodhi në vitin 2014, transmeton Paparaci.
Drashkoviqi ka theksuar se kishte mbështetur angazhimin publik të Vuçiqit për integrimet euroatlantike, për normalizimin e marrëdhënieve me Kosovën.
“E kam mbështetur premtimin e tij publik nëpërmjet mediave se do të jep dorëheqje nga posti i kryeministrit nëse vrasësit e Sllavko Quruvijës nuk akuzohen dhe nuk vihen para drejtësisë. E kam mbështetur premtimin e tij se Serbia, sado që kjo do të na dhembë, do të tronditej nga e vërteta se kush i vrau gjashtë djem serbë në kafenenë “Panda” në Pejë, në dhjetor të vitit 1998, dhe me urdhër të kujt, si dhe nga fakti se vrasësit nuk ishin as shqiptarë, as të huaj”, ka thënë Drashkoviqi.
Ai ka shtuar se e kishte mbështetur Marrëveshjen e Brukselit, me plot shpresë se bëhej fjalë për një transformim të sinqertë të Vuçiqit, i cili ishte akuzuar se e ka tradhtuar opozitën e cila ishte kundër Marrëveshjes së Brukselit dhe që duartrokiste në Sheshin e Republikës atyre peshkopëve që shërbyen përkujtimore për nënshkruesit ende të gjallë të marrëveshjes”.
“E, pikërisht atë Vuçiq dhe një Vuçiq të tillë e kam mbështetur fuqishëm – dhe aspak nuk pendohem. Mirëpo ky njeri nuk është më ai njeri”, ka thënë Drashkoviqi./Paparaci.com
