Parlamenti i Ukrainës ka miratuar emërimin e Yulia Svyrydenkos si kryeministre e re e vendit, në kuadër të një riformatimi të gjerë të kabinetit qeveritar, me synim përmirësimin e menaxhimit shtetëror gjatë kohës së luftës.
Svyrydenko, 39 vjeçe, zëvendëson kryeministrin e mëparshëm me mandat nga Presidenti Volodymyr Zelensky, i cili ka kërkuar që prioritet i qeverisë së re të jetë rritja e prodhimit të armëve në vend dhe rigjallërimi i ekonomisë, që aktualisht është shumë e varur nga ndihmat dhe kreditë ndërkombëtare.
Në fjalimin e tij para Kuvendit, Zelensky tha:
“Pres që brenda gjashtë muajve, armët e prodhuara në Ukrainë të arrijnë të shpërndahen tek 50% e ushtarëve tanë në vijën e frontit.”
Ai gjithashtu theksoi rëndësinë e zgjerimit të bashkëpunimit ekonomik me aleatët perëndimorë, si pjesë kyçe e strategjisë së re qeveritare.
Svyrydenko, e cila që nga viti 2021 ka shërbyer si zëvendëskryeministrja e parë, konsiderohet një teknokrate me përvojë dhe me lidhje të forta ndërkombëtare, sidomos me administratën amerikane, ku ka luajtur rol të rëndësishëm në marrëveshjen për qasjen e SHBA-së në mineralet e rralla të Ukrainës.
Në një reagim pas emërimit, ajo shkroi në platformën X:
“Lufta nuk lë hapësirë për vonesa. Prioritetet tona për gjashtë muajt e parë janë të qarta: furnizim i qëndrueshëm për ushtrinë, rritje e prodhimit të armëve dhe forcim i kapaciteteve teknologjike të mbrojtjes.”
Presidenti Zelensky paralajmëroi gjithashtu marrëveshje të reja me SHBA-në, pa dhënë detaje specifike.
