Deputeti ukrainas Oleksiy Goncharenko ka publikuar atë që ai thotë se është versioni i plotë i planit të paqes që administrata amerikane i ka dorëzuar Kievit. Dokumenti, i strukturuar në shtatë shtylla me 28 pika, përshkruan kushtet më të detajuara deri tani për një marrëveshje të mundshme për t’i dhënë fund konfliktit.
Statusi i Ukrainës
Sipas Goncharenkos, plani kërkon që Ukraina të garantojë neutralitet të përhershëm, duke mbetur jashtë NATO-s me një dispozitë të shkruar në Kushtetutë. Forcat e armatosura do të kufizohen dhe vendi nuk mund të ketë armë bërthamore. SHBA ofron garanci sigurie, por jo të pakushtëzuara.
Territoret
Plani njeh de facto Krimenë, Donetskun dhe Luhanskun si pjesë të Federatës Ruse. Në Kherson dhe Zaporizhzhia parashikohet ngrirja e vijës aktuale të frontit dhe krijimi i një zone të demilitarizuar nën kontroll faktik rus.
Rusia
Moska, sipas draftit, do të detyrohej të nënshkruante një marrëveshje që e ndalon të sulmojë sërish Ukrainën, ndërsa sanksionet ndërkombëtare do të hiqeshin gradualisht. Rusia do të rikthehej me kohë në formatin G8.
Çfarë fiton Ukraina
Plani përfshin 200 miliardë dollarë për rindërtimin, nga të cilat 100 miliardë do të vinin nga asetet ruse të ngrira. Termocentrali bërthamor i Zaporizhzhias do të vihej nën mbikëqyrjen e IAEA-s me shpërndarje të energjisë 50/50. Po ashtu, SHBA dhe BE parashikojnë investime strategjike dhe krijimin e një Fondi Zhvillimi.
Humanitare dhe politike
Parashikohet shkëmbim i plotë i robërve të luftës dhe kthimi i fëmijëve të zhvendosur në Rusi. Brenda 100 ditëve nga nënshkrimi i marrëveshjes, Ukraina do të duhej të zhvillonte zgjedhje dhe të aplikonte një amnisti të përgjithshme për pjesëmarrësit në konflikt.
Mbikëqyrja dhe zbatimi
Një “Këshill Paqeje”, i kryesuar nga Donald Trump, do të monitoronte zbatimin e marrëveshjes. Çdo shkelje do të sillte rikthimin automatik të sanksioneve.
Pretendimet e deputetit ukrainas nuk janë konfirmuar nga Washingtoni apo Kievi, megjithatë përmbajtja përputhet me linjat e raportuara më herët nga mediat amerikane. Nëse dokumenti është autentik, ai përfaqëson kompromiset më të mëdha që Ukraina mund të duhet të pranojë që nga fillimi i luftës dhe sinjalizon një rishikim të thellë të arkitekturës së sigurisë në Evropë.
