Një operacion i gjerë policor është zhvilluar sot në qytetet Prishtinë, Gjilan, Suharekë, Pejë dhe Viti, ku njësitet e Drejtorisë për Hetimin e Narkotikëve, të asistuara nga Forcat Speciale të Policisë së Kosovës, kanë bastisur disa lokacione të dyshuara si pjesë e një rrjeti të organizuar kriminal.
Sipas burimeve të Gazetës Sinjali, bastisjet janë kryer në bazë të urdhëresave të lëshuara nga gjykatat kompetente dhe janë pjesë e një hetimi të koordinuar me Prokurorinë, që kishte nisur prej javësh.
Gjatë këtij aksioni janë arrestuar disa persona, të cilët dyshohen për përfshirje në aktivitet të paligjshëm me substanca narkotike. Të arrestuarit aktualisht janë duke u intervistuar, ndërsa autoritetet nuk kanë konfirmuar ende nëse të gjithë do të ndalohen me vendim të prokurorit.
Sipas Policisë, operacioni është ende në zhvillim, dhe nuk përjashtohet mundësia e arrestimeve të tjera gjatë ditës.
Ky aksion konsiderohet si një goditje e fortë ndaj rrjeteve të shpërndarjes dhe trafikimit të drogës në vend, dhe është pjesë e përpjekjeve të vazhdueshme të institucioneve të sigurisë për luftimin e krimit të organizuar.
Qendra.Info do të vazhdojë të raportojë për zhvillimet e mëtejshme, sapo të dalin detaje zyrtare nga Policia dhe Prokuroria.
