Fushat e fshatit Mushtisht, në Komunën e Suharekës, janë përfshirë nga një zjarr i madh, i cili po përhapet me shpejtësi për shkak të temperaturave të larta dhe erës.
Kryetari i Suharekës, Bali Muharremaj, përmes një postimi në rrjetin social Facebook, u ka bërë thirrje qytetarëve që posedojnë pajisje për shuarjen e zjarrit që t’i dalin në ndihmë zjarrfikësve në terren.
“Kushdo që ka mundësi dhe pajisje për shuarje të zjarrit, le të ndihmojë në zonën Dubravë – Sallagrazhdë – Mushtisht,” shkroi ai, duke bashkëngjitur edhe një video nga vendngjarja.
Zjarrfikësit ndodhen në vendin e ngjarjes, por për shkak të përmasave të zjarrit, kapacitetet aktuale nuk janë të mjaftueshme për kontrollin e flakëve.
