Në Zvicër ka nisur sot gjyqi ndaj dy personave nga Ballkani, të akuzuar për mbështetje dhe pjesëmarrje në një grup ekstremist që, sipas autoriteteve, kishte planifikuar të destabilizonte një rajon të Kosovës.
Të akuzuarit janë një 37-vjeçar kosovar dhe një 34-vjeçar me shtetësi të dyfishtë zvicerane dhe maqedonase. Ata jetonin në rajonin e Gjenevës dhe u arrestuan në shtator të vitit 2022, pas një periudhe të gjatë hetimesh dhe mbikëqyrjeje. Që prej asaj kohe, ndodhen në paraburgim.
Sipas Zyrës së Prokurorit të Përgjithshëm të Zvicrës, ndaj tyre rëndojnë disa akuza të rënda, përfshirë:
-
pjesëmarrje dhe mbështetje të një organizate terroriste,
-
ryshfet ndaj zyrtarëve të huaj publikë,
-
pastrim parash,
-
pengim të procedurave penale,
-
falsifikim dokumentesh dhe
-
mashtrim tregtar.
Megjithatë, të dy të pandehurit presumohen të pafajshëm deri në shpalljen e vendimit përfundimtar.
Organizata “Vëllezërit Vitia” dhe degët e saj në Zvicër
Sipas aktakuzës, të dy burrat akuzohen se kanë mbështetur dhe financuar një organizatë islamike në Kosovë, të njohur si “Vëllezërit Vitia”. Midis viteve 2014 dhe 2022, ata dyshohet se kanë udhëhequr degën e saj në Zvicër, të quajtur “Vëllezërit e Gjenevës”, e cila ka qenë aktive në zonën e Liqenit të Gjenevës.
Ky grup, sipas hetuesve, ka rekrutuar anëtarë kryesisht nga komuna e Vitisë në Kosovë dhe, në një masë më të vogël, nga Maqedonia e Veriut.
Duke filluar nga viti 2016, grupi dyshohet se ka rekrutuar besimtarë rreth xhamisë në Petit-Saconnex, Gjenevë, duke u fokusuar më pas në financimin e aktivitetit të organizatës në Kosovë.
Fondet e mbledhura dhe përdorimi i tyre
Sipas aktakuzës, paratë e mbledhura përmes abonimeve, donacioneve, por edhe mashtrimeve me sigurime shoqërore dhe kredi Covid, kanë arritur në 64,000 deri në 77,000 franga zvicerane – shuma që më pas janë dërguar në Kosovë.
Prokuroria pretendon se qëllimi i “Vëllezërve Vitia” ishte shfrytëzimi i paqëndrueshmërisë politike në Kosovë për të krijuar një shtet islamik të qeverisur nga ligji i Sheriatit. Fondet, sipas dokumenteve të gjykatës, janë përdorur për blerje armësh dhe korruptim gjyqtarësh që do të trajtonin rastet e anëtarëve të grupit.
Në vitin 2016, të dy burrat dyshohet se kanë ndihmuar në ruajtjen e katër pushkëve sulmuese Kalashnikov, një pistoletë dhe rreth 3,000 fishekëve në një shtëpi të sigurt në Kosovë. Po ashtu, ata akuzohen se kanë organizuar takime indoktrinimi fetar në Gjenevë, ku kanë ftuar edhe imamë të huaj.
Procesi gjyqësor po mbahet në Gjykatën Federale Penale të Zvicrës në Bellinzona dhe pritet të zgjasë disa ditë.
