Është ngritur shqetësim serioz në opinionin publik pas publikimit të një fotografie ku Rektori i Universitetit “Fehmi Agani” në Gjakovë, Drilon Bunjaku, së bashku me dy prorektore, shihet duke pozuar pranë flamurit të Serbisë.
Ky akt konsiderohet thellësisht i papranueshëm, sidomos duke pasur parasysh kontekstin historik dhe simbolik që mbart ky universitet – i cili mban emrin e një figure të shquar të rezistencës kombëtare shqiptare. Flamuri i Serbisë, një shtet që ka kryer gjenocid në Kosovë, ende nuk e njeh pavarësinë e saj dhe vazhdon të mohojë krimet e luftës, nuk përfaqëson vlerat mbi të cilat është ndërtuar arsimi publik në vend.
Pozimi i udhëheqësve të këtij institucioni pranë këtij simboli shihet si fyerje për viktimat e luftës, për historinë e dhimbshme të Kosovës dhe për dinjitetin institucional të arsimit tonë. Ky veprim hedh hije të rënda mbi integritetin moral dhe profesional të drejtuesve të këtij universiteti.
Kërkohet urgjentisht përgjegjësi dhe reflektim institucional. Universiteti i Gjakovës nuk mund të përfaqësohet nga individë që relativizojnë të kaluarën e dhimbshme të popullit tonë dhe nuk tregojnë ndjeshmëri ndaj sakrificave të historisë sonë të afërt.
