Sot shënohen 26 vjet nga rënia heroike e komandantit të Ushtrisë Çlirimtare të Kosovës, Ilaz Kodra, njëri ndër figurat e para të celulave të UÇK-së dhe pjesëmarrës i të gjitha betejave në Drenicë dhe rrethinë.
Ilaz Kodra lindi më 3 maj 1966 në lagjen Kodra të Prekazit. Arsimin fillor e kreu në vendlindje, ndërsa tetëvjeçaren dhe gjimnazin në Skenderaj. Pas shkollës së mesme, ai vazhdoi studimet në Shkollën e Lartë Komerciale në Pejë. Kodra kreu shërbimin ushtarak të detyrueshëm në Slloveni, përpara se t’i bashkohej rezistencës çlirimtare kundër forcave serbe.
Gjatë muajit prill të vitit 1999, në një periudhë kur forcat serbe po kryenin krime të rënda kundër popullsisë civile të Kosovës, të ndihmuara nga ofensivat ajrore të NATO-s, Ilaz Kodra mori lajmin për përpjekjet e armikut për të sulmuar fshatrat Verboc dhe Shtuticë. Ai u nis menjëherë për t’u dalë në ndihmë banorëve të rrezikuar.
Mëngjesin e 30 prillit 1999, rreth orës 05:30, filloi një ofensivë e ashpër nga forcat serbe, të cilat kishin rrethuar zonën në formë patkoi. Në përballje të drejtpërdrejtë me armikun, Ilaz Kodra ra heroikisht në fshatin Shtuticë, duke dhënë jetën për lirinë e atdheut.
Në nder të veprës së tij dhe kujtimit të të rënëve për liri, Komuna e Drenasit dhe ajo e Skenderajt organizojnë sot homazhe në varrezat e dëshmorëve dhe martirëve, si dhe ceremoninë e zbulimit të pllakave përkujtimore në fshatrat Shtuticë dhe Gllobar.
