Sot shënohen 27 vjet nga Masakra e Reçakut, një nga krimet më të rënda të kryera gjatë luftës në Kosovë, e cila vazhdon të mbetet një plagë e hapur në kujtesën kolektive të vendit.
Më 15 janar 1999, forcat policore dhe ushtarake serbe, të mbështetura nga grupe paramilitare, hynë në fshatin Reçak të komunës së Shtime, ku ekzekutuan mizorisht 45 civilë shqiptarë. Viktimat u vranë në rrethana që tronditën thellë opinionin vendor dhe ndërkombëtar, duke u kthyer në një dëshmi të qartë të krimeve të kryera kundër popullatës civile.
Masakra u bë e njohur për botën pas reagimit të menjëhershëm të shefit të atëhershëm të Misionit Verifikues të OSBE-së në Kosovë, William Walker. Pas inspektimit në terren dhe pamjes së trupave të pajetë të civilëve, Walker ngriti alarmin ndërkombëtar për krime të rënda kundër njerëzimit që po kryheshin ndaj shqiptarëve në Kosovë.
Reçaku u shndërrua në simbol të vuajtjes dhe sakrificës së popullit të Kosovës, por edhe në një moment kyç që ndikoi drejtpërdrejt në ndërgjegjësimin ndërkombëtar për realitetin e luftës. Kjo ngjarje konsiderohet si një nga pikat kthese që çoi drejt zhvillimeve vendimtare dhe përfundimit të luftës.
Homazhe shtetërore dhe përkujtim në shkolla
Në kuadër të përvjetorit, sot do të mbahen homazhe shtetërore, ku pritet të marrin pjesë krerët më të lartë të institucioneve të Kosovës, përfshirë Presidenten Vjosa Osmani, Kryetarin e Kuvendit Dimal Basha, si dhe Kryeministrin në detyrë Albin Kurti. Homazhe do të bëjë gjithashtu edhe kryetari i AAK-së, Ramush Haradinaj.
Po ashtu, Ministria e Arsimit ka bërë të ditur se ora e parë mësimore në të gjitha shkollat e Kosovës do t’i kushtohet Masakrës së Reçakut, si pjesë e përkujtimit dhe edukimit të brezave të rinj mbi krimet e luftës dhe rëndësinë e drejtësisë dhe paqes.
Masakra e Reçakut mbetet një kujtesë e përhershme për vuajtjet e popullit të Kosovës dhe një thirrje e vazhdueshme për drejtësi, kujtesë historike dhe mos-harrim.
