Me rastin e 30-vjetorit të anëtarësimit të Shqipërisë në Këshillin e Europës, Kryetarja e Kuvendit, Elisa Spiropali, ka dhënë një mesazh reflektues mbi rrugëtimin europian të vendit dhe sfidat që e presin përpara.
Në deklaratën e saj, Spiropali theksoi rëndësinë historike dhe aktuale të këtij institucioni për konsolidimin e demokracisë, shtetit të së drejtës dhe të drejtave të njeriut në Shqipëri. Ajo rikujtoi se më 21 prill 2024, Shqipëria doli zyrtarisht nga faza e monitorimit të Këshillit të Europës, pas një serie reformash thelbësore në drejtësi dhe luftës kundër korrupsionit.
“30 vjet më parë Shqipëria u bë anëtare e Këshillit të Europës – një hap kyç në rrugën drejt forcimit të demokracisë dhe të institucioneve që e garantojnë atë,” – u shpreh Spiropali, duke vlerësuar edhe përparimin në respektimin e standardeve të të drejtave të njeriut.
Këshilli i Europës nuk është i plotë pa Kosovën
Në vijim të mesazhit të saj, Spiropali nënvizoi se Shqipëria është një mbështetëse e palëkundur e anëtarësimit të Republikës së Kosovës në Këshillin e Europës. Ajo deklaroi se kjo organizatë e rëndësishme ndërkombëtare “nuk është e plotë pa pjesëmarrjen e plotë dhe të barabartë të Kosovës”.
“Është momenti të ritheksojmë se anëtarësimi i Kosovës duhet të ndodhë sa më shpejt. Këshilli i Europës është më i fortë dhe më përfaqësues me Kosovën si pjesë të tij,” – theksoi Spiropali.
Vlerësim për kontributin parlamentar
Kryeparlamentarja gjithashtu shprehu mirënjohje për delegacionin shqiptar në Asamblenë Parlamentare të Këshillit të Europës, duke vlerësuar kontributin e tyre ndër vite në avancimin e çështjeve me rëndësi për Shqipërinë.
“Ky përvjetor është jo vetëm moment festimi, por edhe reflektimi për rrugën që kemi përshkuar dhe detyrat që na presin përpara. Kuvendi i Shqipërisë mbetet i përkushtuar në thellimin e reformave dhe rritjen e standardeve demokratike”, – përfundoi Spiropali.
Shqipëria u bë anëtare e Këshillit të Europës më 13 korrik 1995. Dalja nga monitorimi i KiE në prill 2024 konsiderohet një hap domethënës në afrimin e mëtejshëm të vendit drejt anëtarësimit në Bashkimin Europian.
