Agjencia e Menaxhimit Emergjent (AME) ka raportuar se gjatë periudhës 14:00–20:00 të së shtunës janë regjistruar gjithsej 40 vatra zjarri në territorin e Kosovës. Nga to, 15 mbeten ende aktive, ndërsa 25 të tjera janë lokalizuar.
Situata më e rënduar është shënuar në fshatin Dumnicë të Komunës së Podujevës, ku për shkak të përhapjes së shpejtë të flakëve është kërkuar asistencë nga njësi të tjera. Në operacion janë angazhuar njësitë e Prishtinës, Vushtrrisë dhe Mitrovicës, si dhe është bërë kërkesë për ndërhyrje ajrore nga KFOR-i për të ndihmuar në shuarjen e zjarrit.
Menaxhimi i situatës po bëhet në bashkëpunim të plotë me Njësitë Profesionale të Zjarrfikjes dhe Shpëtimit, ndërsa AME apelon qytetarët të tregojnë kujdes maksimal, të shmangin çdo veprim që mund të shkaktojë zjarr dhe të raportojnë menjëherë çdo vatër në numrat emergjentë 112, 193 dhe 192.
Agjencia ka shprehur mirënjohje për punën e palodhshme të zjarrfikësve, mbështetjen e Policisë së Kosovës dhe bashkëpunimin e qytetarëve në përballimin e situatës.
