Prokuroria Themelore në Gjakovë ka kërkuar caktimin e masës së paraburgimit prej 30 ditësh ndaj një personi të dyshuar për fajde.
Sipas njoftimit zyrtar, prokuroria ka marrë aktvendim për fillimin e hetimeve ndaj të pandehurit me inicialet M.I., ndërsa kërkesa për paraburgim është dorëzuar në Gjykata Themelore në Gjakovë – Dega në Rahovec.
Prokuroria dyshon se që nga qershori i vitit 2024, i dyshuari kishte dhënë hua në mënyrë të kundërligjshme duke shfrytëzuar gjendjen e rëndë financiare të viktimës. Sipas hetimeve, i dëmtuari H.F. kishte marrë 7 mijë euro për shkak të nevojave për trajtim shëndetësor, ndërsa ishte detyruar të paguante çdo muaj nga 700 euro si kamatë.
Deri në momentin e nisjes së hetimeve, viktima kishte paguar gjithsej 14 mijë euro kamatë.
Policia e arrestoi të dyshuarin më 21 shkurt 2026 gjatë realizimit të masave të veçanta hetimore, në momentin kur ai po merrte edhe 700 euro të tjera nga i dëmtuari.
Sipas prokurorisë, me këto veprime i dyshuari ka kryer veprën penale “Fajdeja”, sipas nenit 331 të Kodi Penal i Republikës së Kosovës.
Aktualisht, i dyshuari ndodhet nën masën e ndalimit prej 48 orësh, ndërsa gjykata pritet të vendosë për kërkesën e prokurorisë për paraburgim.