Kryetari i Kuvendit të Republikës së Kosovës, Glauk Konjufca, priti sot Ambasadorin e Britanisë së Madhe në Kosovë, Jonathan Hargreaves. Në këtë takim, u diskutua për marrëdhëniet e shkëlqyera mes dy vendeve dhe për projektet që synojnë thellimin e mëtejshëm të këtyre lidhjeve, zhvillimin e Kosovës në fusha të ndryshme, si dhe ruajtjen e interesave të përbashkëta.
Kryetari Konjufca informoi ambasadorin mbi çështjet aktuale, duke theksuar se Kosova është e interesuar për mbështetje të vazhdueshme nga Britania e Madhe, për forcimin e sigurisë, stabilitetit, zhvillimit ekonomik dhe procesit të demokratizimit, si dhe integrimin në organizatat ndërkombëtare. Ai shprehu mirënjohjen për mbështetje të hershme të Britanisë dhe theksoi rëndësinë e vazhdimit të traditës së bashkëpunimit.
Ambasadori Hargreaves falënderoi Konjufcën për pritjen dhe konfirmoi se mbështetja e Britanisë për Kosovën do të vazhdojë, duke shprehur angazhimin e tij për të përmirësuar marrëdhëniet mes dy vendeve.
Në një tjetër takim, Kryetari Konjufca priti Ambasadoren e re të Holandës në Kosovë, Karin Boven. Ai e falënderoi për vizitën dhe e uroi për detyrën e re, duke shprehur mirënjohjen për kontributin holandez në Kosovë dhe rëndësinë e vazhdimit të mbështetjes, veçanërisht në procesin e integrimeve.
Gjatë takimit, ata diskutuan çështje aktuale dhe theksuan nevojën për mbështetje të Holandës në sfidat që përballon vendi, përfshirë zhvillimin socio-ekonomik dhe çështjet e diasporës. Të dy bashkëbiseduesit vlerësuan bashkëpunimin mes vendeve dhe ranë dakord për thellimin e marrëdhënieve në të gjitha fushat.
Ambasadorja Boven shprehu gatishmërinë e saj për të bashkëpunuar në bazë të interesave dhe vlerave të përbashkëta evropiane, duke konfirmuar se mbështetja e Holandës për Kosovën do të vazhdojë edhe në të ardhmen.
