Sot shënohet 26-vjetori i masakrës së Izbicës, një nga ngjarjet më tragjike të luftës në Kosovë. Në vitin 1999, forcat policore dhe ushtarake serbe, pas rrethimit të fshatit Izbicë të Skenderajt dhe vendbanimeve përreth, veçuan 147 burra, djem të rinj dhe pleq, të cilët u vranë dhe u masakruan. Pjesa tjetër e banorëve të fshatit u dëbua me forcë jashtë Kosovës.
Masakra e Izbicës mbetet një nga krimet më të rënda të regjimit serb gjatë periudhës së luftës, duke shënuar një akt të pashembullt brutaliteti. Vrasjet masive, përdhosja e trupave dhe varrosja e tyre në kushte të tmerrshme u dokumentuan përmes pamjeve satelitore, duke e shndërruar ngjarjen në një lajm botëror.
Ndër viktimat e kësaj masakre ishte edhe një foshnje vetëm gjashtë muajsh, e cila u bë simbol i pafajësisë së humbur gjatë këtij krimi të tmerrshëm.
Deri tani, një person është arrestuar dhe akuzuar për pjesëmarrje në këtë krim monstruoz. Ai është Muhamet Alidemaj, një shqiptar me shtetësi të Serbisë, i cili po përballet me akuzat për masakrën e Izbicës. Ky proces vazhdon, ndërsa drejtësia për viktimat e këtij krimi të rëndë mbetet një prioritet.
