Italiani, i njohur për arritjet e tij në futboll, është i detyruar të dalë në gjykatë në Madrid javën e ardhshme për akuza të rënda. Prokuroria e Shtetit e akuzon Ancelottin, 65 vjeç, për mosdeklarimin e të ardhurave të tij ndaj autoriteteve tatimore spanjolle. Akuzat lidhen me fitimet e padeklaruara nga të drejtat e imazhit në vitet 2014 dhe 2015, për të cilat thuhet se i kanë shkaktuar shtetit spanjoll një dëm prej më shumë se një milion eurosh.
Gjyqi i Carlo Ancelottit fillon të mërkurën dhe pritet të zgjasë dy ditë, tha një zëdhënës i gjykatës. Trajneri i famshëm, i cili ka fituar pesë herë Ligën e Kampionëve si trajner, përfshirë tri herë me Real Madridin, do të marrë pjesë në seancat dëgjimore.
Prokurorët e akuzojnë Ancelottin për mosdeklarimin e të ardhurave të tij të tjera, përfshirë të drejtat e imazhit dhe pasuritë e paluajtshme, duke përdorur një sistem “kompleks” dhe “konfuz” të kompanive guaskë për të fshehur këto të ardhura. Sipas prokurorisë, ai ka deklaruar vetëm kompensimin personal që ka marrë nga Real Madridi gjatë viteve 2014 dhe 2015, megjithëse vetë ai ka qenë rezident tatimor në Spanjë dhe ka deklaruar se shtëpia e tij ndodhej në Madrid.
Një gjykatë spanjolle kishte urdhëruar vitin e kaluar që Ancelotti të dilte në gjyq për këtë aferë, por nuk ishte caktuar një datë. Kur u pyet për këtë rast vitin e kaluar, trajneri e hodhi poshtë si “një histori të vjetër që shpresoj se do të zgjidhet së shpejti.”
Carlo Ancelotti ka një karrierë të shkëlqyer si trajner, pasi ka drejtuar disa nga klubet më të mëdha europiane, duke përfshirë Milan, Chelsea, PSG, Bayern Munich, Napoli, Everton dhe Real Madrid. Si futbollist, ai ka luajtur për Parma, Roma dhe Milan, duke fituar dy herë Kupën e Europës me Milanin.
Përveç suksesit në Ligën e Kampionëve, Ancelotti ka fituar tituj kampion kombëtar me klubet që ka drejtuar, duke përfshirë Real Madridin dhe Milanin, si dhe kampionate në Angli me Chelsean, në Gjermani me Bayern Munich dhe në Francë me PSG.
