Sot, në orën dy të mëngjesit, akrepët e orës u zhvendosën për një orë përpara, duke kaluar në orën verore dhe duke lënë pas periudhën dimërore. Kjo lëvizje është pjesë e praktikës që ndodh çdo të diel të fundit të marsit, duke u përsëritur çdo vit, ku ora lëviz një orë përpara, dhe çdo të diel të fundit të tetorit, kur ora kthehet prapa.
Ky ndryshim i orës ka një histori të gjatë që daton pas Luftës së Dytë Botërore, kur u vendos për herë të parë në Austri dhe Gjermani. Qëllimi i kësaj mase ishte ulja e konsumit të energjisë dhe shfrytëzimi më efikas i orëve të ditës. Ndërkohë, kjo praktikë ka treguar rezultate pozitive në uljen e aksidenteve trafiku dhe krimit, ndërsa ka kontribuar edhe në ekonominë e disa shteteve.
Megjithatë, kjo masë ka dhe kundërshtarët e saj. Disa studiues besojnë se ndryshimi i orës ka ndikime negative në shëndetin e njerëzve. Për këtë arsye, në vitin 2019, Komisioni Evropian propozi një moratorium mbi ndryshimet e orës që nga viti 2021, duke i lënë vendimin për zbatimin e tij shteteve anëtare të BE-së.
Në vitin 2018, një konsultim publik për këtë çështje u zhvillua në të gjithë Bashkimin Evropian, ku morën pjesë 4.6 milionë qytetarë. Rreth 84% e tyre mbështetën mbylljen e praktikës së ndryshimit të orës. Megjithatë, duke marrë parasysh që Komisioni Evropian ka publikuar orarin veror deri në vitin 2026, kjo praktikë do të vijojë për disa vite të tjera.
Në shumë shtete të botës, ora nuk ndryshohet, dhe madje, edhe aty ku bëhet, nuk është e detyrueshme që të ndodhë në të njëjtën ditë.
