Në një darkë pune të mbajtur mbrëmë, Kryeministri i Republikës së Kosovës, Albin Kurti, priti Sekretarin e Shtetit për Punë të Jashtme të Mbretërisë së Bashkuar, David Lammy, dhe Dërguaren e Posaçme për Ballkanin Perëndimor, Karen Pierce. Po ashtu, në këtë takim morën pjesë edhe zyrtarë të lartë të Qeverisë së Kosovës, përfshirë Zëvendëskryeministren dhe Ministren e Punëve të Jashtme dhe Diasporës, Donika Gërvalla-Schwarz, Ministrin e Financave, Hekuran Murati, Ministren e Drejtësisë, Albulena Haxhiu, Ministren e Ekonomisë, Artane Rizvanolli, Ministrin e Kulturës, Hajrulla Çeku, Ministrin për Komunitete dhe Kthim, Nenad Rashiq, dhe Shefen e Grupit Parlamentar të Lëvizjes VETËVENDOSJE!, Mimoza Kusari-Lila.
Kryeministri Kurti uroi mirëseardhjen në Kosovë Sekretarin Lammy dhe shprehu falënderimet e tij për kontributin dhe mbështetjen që Mbretëria e Bashkuar ka ofruar gjatë etapave të shtetndërtimit të Kosovës. Ai po ashtu theksoi miqësinë dhe partneritetin e ngushtë mes dy vendeve.
Në fjalën e tij, Kryeministri Kurti vlerësoi bashkëpunimin e fortë të Kosovës me Mbretërinë e Bashkuar, duke veçuar bashkëpunimin ndërmjet Forcës së Sigurisë së Kosovës (FSK) dhe institucioneve britanike të mbrojtjes dhe sigurisë. Ai gjithashtu i uroi Lammy dhe Pierce për pritjen e Samitit të Procesit të Berlinit nga Mbretëria e Bashkuar këtë vit, duke ofruar bashkëpunim për të siguruar suksesin e këtij samiti.
Kryeministri informoi Sekretarin Lammy për progresin demokratik dhe zhvillimin ekonomik të Kosovës, duke i theksuar rankimet pozitive në fushat e sundimit të ligjit, luftës kundër korrupsionit dhe demokracisë. Ai gjithashtu njoftoi për investimet në fushën e mbrojtjes dhe rritjen e buxhetit për mbrojtje në nivelin 2% të BPV-së, duke e quajtur këtë një standard të NATO-s. Kurti përsëriti synimet e Kosovës për anëtarësim në NATO, Bashkimin Evropian dhe Këshillin e Evropës.
Gjatë diskutimit, Kryeministri Kurti dhe Sekretari Lammy folën për situatën aktuale në rajon dhe çështjet e sigurisë, ndërkohë që Kurti theksoi rëndësinë e drejtësisë për sulmin terrorist në Banjskë. Ai kërkoi që Millan Radoiçiq, i cili është ende i lirë dhe mbrojtur nga shteti serb, të ekstradohet në Kosovë dhe të përballet me një gjykim të drejtë.
