Një protestë kundër rritjes së çmimit të energjisë elektrike do të mbahet të shtunën, më 5 prill, në Prishtinë. Qytetarë dhe aktivistë do të mblidhen në sheshin “Skënderbe”, duke filluar nga ora 15:00, për të kundërshtuar vendimin për rritjen prej 15% të tarifave të energjisë.
Organizatori i protestës, Luan Hasanaj nga grupi “Asnjë Cent më Shumë”, ka bërë thirrje për pjesëmarrje të gjerë dhe solidaritet nga të gjithë qytetarët dhe bizneset. Ai ka theksuar se kjo rritje e çmimit nuk është vetëm barrë për familjet, por ndikon rëndë edhe në sektorin privat, duke rritur ndjeshëm kostot e operimit dhe duke rrezikuar qëndrueshmërinë e shumë bizneseve.
Në shenjë simbolike proteste, Hasanaj ka kërkuar që të gjitha bizneset të mbyllin lokalet e tyre për një orë, nga ora 15:00 deri në 16:00.
Protestuesit pritet të shprehin pakënaqësinë e tyre në mënyrë paqësore, ndërsa organizatorët bëjnë thirrje që protesta të zhvillohet me dinjitet dhe qetësi.
