Keith Kellogg, i dërguari i posaçëm i presidentit amerikan Donald Trump për Ukrainën, ka sugjeruar një plan të diskutueshëm për të krijuar zona të kontrollit në Ukrainë, të ngjashme me modelin e Berlinit të pasluftës. Kjo ide u shpreh gjatë një interviste për gazetën britanike The Times, e cila u botua sot.
Sipas propozimit të Kellogg, Ukraina mund të ndahej në zona të kontrolluara nga aleatët dhe Rusia, me një zonë të çmilitarizuar që do të ndante forcat ruse nga ato aleate. Ai sugjeroi që forcat aleate, përfshirë britanikët, francezët dhe ukrainasit, do të pushtonin zonat perëndimore të lumit Dnipro, ndërsa një zonë e çmilitarizuar do të krijohej për të ndarë këto zona nga ato të pushtuara nga Rusia në lindje.
Kellogg bëri një krahasim me situatën pas Luftës së Dytë Botërore, kur Berlini u nda në zona të kontrolluara nga fuqitë e ndryshme – sovjetikët, francezët, britanikët dhe amerikanët. Ai beson se krijimi i një pengese natyrore mes forcave aleate dhe ruse do të ndihmonte në shmangien e provokimeve, duke shtuar se ky opsion mund të ishte një mënyrë e efektshme për të siguruar një armëpushim të qëndrueshëm.
Megjithatë, Kellogg pranoi se presidenti rus Vladimir Putin mund të mos e mbështeste këtë plan. Ai gjithashtu theksoi se megjithëse mund të ndodhnin shkelje të armëpushimit, ato do të ishin të lehta për t’u kontrolluar.
Pas publikimit të intervistës, Kellogg shkroi në rrjetin social X duke sqaruar se gazetari kishte keqinterpretuar idenë e tij. Ai theksoi se nuk po fliste për një ndarje të Ukrainës mes fuqive të huaja, por për krijimin e “zonave të përgjegjësisë” për forcat aleate në mbështetje të një armëpushimi.
Propozimi i Kellogg u bë i njohur një ditë pasi Steve Witkoff, i dërguari i Trump për çështjet e Ukrainës, u kthye nga vizita e tij e tretë në Rusi, ku zhvilloi një bisedë disa orëshe me presidentin Putin. Nuk dihet ende se çfarë arritën të diskutojnë ata për çështjen e Ukrainës, pasi Kremlini kishte njoftuar më parë se nuk pritej një përparim substancial gjatë bisedimeve.
