Kryetari i Aleancës për Ardhmërinë e Kosovës (AAK), Ramush Haradinaj, ka lëshuar një kritikë të ashpër ndaj qeverisë në largim, duke e akuzuar për dështim në përmirësimin e kushteve të punëmarrësve dhe për trajtim arrogant ndaj tyre. Në një deklaratë me rastin e Ditës Ndërkombëtare të Punëtorëve, Haradinaj theksoi se paga minimale është kthyer në një formë asistence, ndërsa paga mesatare mezi mbulon nevojat bazike të jetesës.
Sipas tij, pagat në sektorin publik dhe privat mbeten ndër më të ultat në rajon, ndërsa inflacioni po rëndon gjithnjë e më shumë mbi qytetarët. “Në vend të dialogut me sindikatat, kemi monolog qeveritar, përbuzje dhe arrogancë. Punëmarrësit publikë trajtohen pa dinjitet,” u shpreh Haradinaj, duke shtuar se 1 Maji këtë vit shoqërohet me retorikë boshe, largime masive nga vendi dhe humbje të shpresës.
Ai i drejtoi një urim punëtorëve të Kosovës, duke u dëshiruar “ditë më të mira” dhe duke premtuar angazhim për ndryshim. “Kjo është e vërteta e një qeverisje mashtruese!” përfundoi Haradinaj, duke nënvizuar nevojën për një qasje më të përgjegjshme qeverisëse.
