Seanca konstituive e Kuvendit të Kosovës është ndërprerë sërish, pasi Lëvizja Vetëvendosje kërkoi që votimi për kryetarin e Kuvendit të bëhet në mënyrë të fshehtë – kërkesë kjo që hasi në kundërshtim të ashpër nga partitë opozitare.
Përpjekja e Vetëvendosjes për të kaluar përbërjen e komisionit që do të mundësonte votimin e fshehtë dështoi, pasi në votim morën pjesë vetëm 55 deputetë. Meqë nuk u arrit shumica e nevojshme, kërkesa u rrëzua.
Kryesuesi i seancës, Avni Dehari, njoftoi se për shkak të pamundësisë për të proceduar më tej, seanca do të vazhdojë të shtunën, më 3 maj, në orën 10:00.
“Në votim kanë marrë pjesë 55 deputetë, kundër ka qenë një, abstenim nuk ka. Atëherë detyrohemi ta ndërpresim seancën. Shihemi më 3 maj në orën 10:00”, tha Dehari para deputetëve.
Deri më tani, konstituimi i Kuvendit të ri të Kosovës po përballet me vonesa për shkak të mospajtimeve ndërmjet partive parlamentare.
