Deputetja e Partisë Demokratike të Kosovës, Blerta Deliu-Kodra, ka reaguar ashpër pas publikimit të raportit të Reporterëve pa Kufij, sipas të cilit Kosova ka rënë në vendin e 99-të në ranglistën globale për lirinë e shprehjes. Ajo ka akuzuar Qeverinë Kurti për ndërtimin e një “regjimi linçimi dhe frikësimi”, duke e cilësuar këtë si një nga momentet më të errëta në historinë e shtetit.
Në një konferencë për media, Deliu-Kodra theksoi se rënia e Kosovës nga vendi i 56-të në vitin 2023, në vendin e 75-të në 2024, për të përfunduar në vendin e 99-të sivjet, është një tregues alarmant për lirinë e fjalës në vend.
“Kjo është renditja më e ulët që ka pasur ndonjëherë Kosova. Një rënie dramatike që nuk është thjesht rrëshqitje, por rrënim i qëllimshëm. Për këtë gjendje, raporti e bën të qartë se përgjegjëse është Qeveria e udhëhequr nga Vetëvendosje”, deklaroi ajo.
Deputetja e PDK-së tha se kjo rënie është ndjerë në të gjitha nivelet e shoqërisë – nga gazetarët që, sipas saj, janë sulmuar, deri te qytetarët që janë linçuar publikisht. Sipas saj, Qeveria ka ndërtuar një mekanizëm propagandistik që synon të shuajë çdo zë kritik, veçanërisht në rrjetet sociale.
“Kemi një pushtet që frikësohet nga fjala, sepse e di që nuk ka të drejtë. Dhe një pushtet që nuk ka të drejtë, nuk ka as të ardhme”, tha Deliu-Kodra.
Ajo shtoi se Kosova është viktimë e një qeverisjeje të dështuar që po shënon rënie në çdo indikator – ekonomik, social dhe të sigurisë.
Duke e krahasuar situatën në Kosovë me atë në Serbi, Deliu-Kodra vuri në pikëpyetje pozicionin e Kryeministrit Albin Kurti: “Nëse dikur jemi pajtuar me Kurtin që Vuçiq është autokrat, sot kur Kosova renditet më keq se Serbia për lirinë e shprehjes, çfarë mbetet të themi për të?”
Në fund, ajo u zotua se opozita do të vazhdojë të ngrejë zërin për të mbrojtur lirinë e fjalës dhe për të kthyer atë si themel të Republikës së Kosovës.
