Shtetet e Bashkuara të Amerikës kanë bërë të ditur se nuk do të vazhdojnë më të ndërmjetësojnë në negociatat e paqes midis Ukrainës dhe Rusisë. Lajmi u konfirmua nga zëdhënësja e Departamentit të Shtetit, Tammy Bruce, gjatë një konference për shtyp të enjten.
“Ne jemi ende të përkushtuar ndaj përpjekjeve për paqe dhe do të ndihmojmë në çdo mënyrë të mundshme. Por nuk do të udhëtojmë më nëpër botë për të ndërmjetësuar në takime që tashmë janë bërë çështje dypalëshe,” tha Bruce.
Ajo theksoi se tashmë është koha që Kievi dhe Moska të paraqesin dhe të zhvillojnë propozime konkrete për t’i dhënë fund konfliktit. “Tani gjithçka varet nga ata,” deklaroi Bruce.
Trump i sillte palët në tryezë, por SHBA tërhiqet
Zëvendëspresidenti amerikan, J. D. Vance, në një intervistë për Fox News, rikujtoi se gjatë presidencës së Donald Trump, SHBA kishte arritur t’i sillte të dyja palët në tryezën e negociatave. Megjithatë, ai nënvizoi se Uashingtoni nuk do të udhëheqë më përpjekjet për ndërmjetësim.
“Kjo situatë nuk po çon askund… dhe nuk do të përfundojë së shpejti,” u shpreh Vance. “Tani u takon vetë palëve të arrijnë një marrëveshje dhe t’i japin fund këtij konflikti brutal dhe jashtëzakonisht të egër.”
Një kthesë në strategjinë diplomatike të SHBA-së
Vendimi për t’u tërhequr nga roli ndërmjetësues shënon një kthesë të rëndësishme në strategjinë diplomatike të SHBA-së në lidhje me konfliktin ruso-ukrainas. Ndonëse mbetet e përkushtuar ndaj mbështetjes për Ukrainën dhe paqen në rajon, Uashingtoni sinjalizon se iniciativa konkrete për përfundimin e luftës duhet të vijë tani nga vetë palët në konflikt.
