Kryeministri i Maqedonisë së Veriut, Hristijan Mickoski, ka njoftuar se pritet të zhvillojë një takim me ministrin Arben Taravari për të diskutuar për funksionimin e tij të mëtejshëm në Qeveri dhe për mundësinë e një bashkëpunimi të Aleancës për Shqiptarët me Bashkimin Demokratik për Integrim (BDI) në zgjedhjet lokale të tetorit.
Mickoski theksoi se një marrëveshje e mundshme mes partisë së Taravarit dhe BDI-së do të ishte e papranueshme për të, duke nënvizuar se kjo do të përbënte “vetëposhtërim politik” dhe një mbështetje të heshtur nga ana e BDI-së, që nuk është në përputhje me parimet e tij si kryeministër.
“Në takim dua qartë të dëgjoj një qëndrim nëse është e vërtetë që ekziston një marrëveshje mes partisë së Taravarit dhe BDI-së, që në pesë ose gjashtë komuna të mos paraqiten kandidatë nga BDI, duke mbështetur në heshtje kandidatët e Taravarit. Kjo është e papranueshme për mua”, tha Mickoski gjatë një deklarate për media pas përkujtimit të 122-vjetorit të vdekjes së Goce Dellçevit.
Ai sqaroi se takimi pritet të zhvillohet brenda javës, ndoshta ditën e nesërme, duke shtuar se ai dhe Taravari kanë komunikim të përditshëm si pjesë e bashkëpunimit qeveritar.
Në vijim të zhvillimeve politike, Mickoski njoftoi se në gjysmën e dytë të muajit maj do të paraqesë para Komitetit Ekzekutiv të VMRO-DPMNE-së listën e kandidatëve për kryetarë komunash për zgjedhjet lokale të planifikuara në tetor.
Ndërkohë, Aleanca për Shqiptarët, e udhëhequr nga Taravari, ka vendosur të garojë me listat e veta për këshilltarë në zgjedhjet lokale, një vendim që ka shkaktuar ndarje brenda Koalicionit VLEN. Partnerët e këtij koalicioni kanë vendosur ta transformojnë atë në një subjekt të përbashkët politik, por pa pjesëmarrjen e Aleancës, duke e akuzuar Taravarin për kontakte të fshehta me opozitën shqiptare, BDI-në.
