Të premten, Kosova do të përballet me një mot të paqëndrueshëm, ku pritet të ketë vranësira të shpeshta dhe intervale kohore me diell. Sipas parashikimeve meteorologjike, në disa rajone, në mënyrë të rrallë, mund të ketë ndonjë rigë apo rrebesh lokal shiu. Situata do të përkeqësohet gjatë mbrëmjes dhe natës, kur pritet dendësim i vranësirave, duke sjellë reshje shiu që fillimisht do të përfshijnë jugun dhe lindjen e vendit, për t’u shpërndarë gradualisht edhe në viset tjera. Temperaturat maksimale do të arrijnë deri në 21°C.
Ndërkohë, në Shqipëri, e premtja do të nisë me intervale diellore dhe vranësira të herëpashershme. Gjatë pasdites dhe orëve të mbrëmjes, veçanërisht në jug të vendit, pritet të ketë reshje shiu dhe rrebeshe lokale. Reshjet do të përhapen gjatë natës edhe në pjesë të tjera të territorit shqiptar, si dhe në Maqedoninë e Veriut, ku parashikohen reshje më intensive.
Po ashtu, në zonat e Kosovës që shtrihen afër kufirit me Maqedoninë e Veriut pritet të ketë reshje më të dendura, krahasuar me viset tjera të Kosovës ku do të ketë vetëm pak reshje ose fare.
Për qytetarët që planifikojnë udhëtime apo aktivitete në natyrë, këshillohet të ndjekin përditësimet më të fundit nga institucionet meteorologjike dhe të marrin masa në përputhje me kushtet e motit.
