Në futbollin e madh, emrat e mëdhenj shfaqen kur ndeshjet peshojnë më shumë. Kjo u dëshmua sërish nga portieri i Paris Saint-Germain, Gianluigi Donnarumma, i cili me paraqitjen e tij mbresëlënëse në fazën eliminatore të Ligës së Kampionëve, u shndërrua në shtyllën kryesore të kualifikimit për në finalen e madhe në Mynih.
Në të dy ndeshjet vendimtare, portieri italian shfaqi refleksin e një maceje, duke e shpëtuar PSG-në në situata të vështira dhe duke u konfirmuar si faktori vendimtar i suksesit.
“Donnarumma – pasaportë për në finale”, titulloi gazeta prestigjioze sportive L’Équipe, duke përmbledhur ndjenjat e miliona tifozëve parisienë.
Nga kritikat te lavdia: një rrugëtim impresionues
L’Équipe vë në pah transformimin e Donnarumma-s gjatë sezonit – nga paraqitjet e pasigurta në fazën e grupeve, te dominimi absolut në sfidat vendimtare. U llogaritën rreth 20 pritje kyçe vetëm në fazën eliminatore. Me qetësi, kontroll emocional dhe vetëbesim të lartë, Donnarumma i mbajti rivalët larg portës dhe dha ndjesinë se çdo tentativë për të shënuar ishte e kotë.
Gjuha e trupit, qasja si lider dhe komandimi i mbrojtjes u bënë pjesë e narrativës së tij si “gardiani i pamposhtur”.
“Çdo javë shfaqej si një portier ndryshe, derisa u bë më i miri në botë“, shkruan më tej L’Équipe.
Një histori besimi dhe falënderimi
Për Gianluigi Donnarumma (26), ky sezon është një kulm i natyrshëm i një karriere që nisi herët. Portieri italian debutoi në moshën 16-vjeçare me Milanin, falë besimit të ndjerit trajner Siniša Mihajlović, i cili më 25 tetor 2015 e hodhi në fushë kundër Sassuolos.
“Ai më ndryshoi jetën”, ka thënë Donnarumma, duke kujtuar momentin kur u shpall lojtari më i mirë i Euro 2020.
Tani, tetë vite më vonë, ai është vetëm një ndeshje larg nga kurorëzimi më i madh me PSG-në.
Finalja e fatit më 31 maj
“Më 31 maj, Donnarumma caktoi një takim me fatin e tij”, shkruan me entuziazëm L’Équipe, duke parashikuar një fund sezoni të paharrueshëm për një prej portierëve më të shquar të dekadës së fundit.
