Sot (e martë) pritet të mbahet seanca e 15-të me radhë për përpjekjen për konstituimin e Kuvendit të Kosovës, por zhvillimet e fundit nuk lënë shumë hapësirë për optimizëm. As këtë herë nuk pritet ndonjë përparim, pasi qëndrimet politike mbeten të pandryshuara dhe tensionet mes partive vazhdojnë.
Lëvizja Vetëvendosje është shprehur e vendosur për të mos tërhequr kandidaturën e Albulena Haxhiut për postin e kryeparlamentares – një emër që vazhdon të hasë në kundërshtimin e partive të tjera opozitare: PDK, LDK dhe AAK.
Kryesuesi i seancës, Avni Dehari, ka tentuar në disa raste të procedojë me votim të fshehtë për zgjedhjen e kryetarit të Kuvendit, por procesi ka ngecur për shkak të mungesës së votave për formimin e komisionit për votim.
Ndërkohë, Aleanca për Ardhmërinë e Kosovës ka ndërmarrë hapa ligjorë, duke e dërguar çështjen në Gjykatën Kushtetuese. AAK konteston disa nga vendimet e kryesuesit të seancës, të cilat i konsideron të njëanshme dhe në kundërshtim me Kushtetutën.
Në përpjekje për të zbutur krizën institucionale, presidentja Vjosa Osmani ka ftuar një takim të përbashkët me përfaqësuesit e partive politike, i cili do të mbahet më 15 maj. Deri më tani, PDK, LDK dhe AAK kanë konfirmuar pjesëmarrjen në këtë takim, ndërsa nga Vetëvendosje ende nuk ka një përgjigje zyrtare.
Ngërçi i vazhdueshëm në Kuvend po ndikon jo vetëm në funksionalitetin e institucioneve, por edhe në klimën politike të vendit, duke lënë të hapur pyetjen: A do të mund të gjendet një kompromis për zhbllokimin e situatës?
