Ish-kryeministri Sali Berisha ka deklaruar se ka nisur zyrtarisht betejën për mbrojtjen e votës së lirë, duke e cilësuar procesin zgjedhor të 11 majit si të manipuluar dhe të pavlefshëm. Në një dalje publike, Berisha theksoi se këto zgjedhje “de fakto janë rrëzuar” dhe kërkoi mobilizimin e qytetarëve për të dokumentuar dhe denoncuar çdo shkelje që, sipas tij, është kryer nga regjimi aktual.
“Detyra numër një në këtë fazë është mbrojtja e votës duke faktuar të gjithë universin kriminal të qarqeve. Çdo evidentim është i domosdoshëm sepse beteja jonë është për të ardhmen e demokracisë në Shqipëri”, u shpreh Berisha.
Ai njoftoi se më 16 maj do të mbahet një protestë para mbërritjes së liderëve evropianë në Tiranë, me synimin për t’i sensibilizuar mbi situatën politike në vend. “Ata duhet të kuptojnë se po vijnë në një narko-shtet, që nuk respekton asnjë rregull dhe asnjë parim të votës së lirë”, tha ai.
Sipas liderit të Rithemelimit, qeveria ka përdorur mjete të paligjshme për të ndikuar në vullnetin e votuesve, përfshirë shpërndarjen e parave dhe vendime të qeverisë në funksion të manipulimit zgjedhor. Ai e cilësoi këtë një “batërdí elektorale” dhe theksoi se opozita është e vendosur për të dokumentuar me prova çdo shkelje.
“Ne do ta fitojmë këtë betejë, sepse çdo shqiptar që e njeh veten të tillë e ka parë se çfarë ndodhi. Këto krime elektorale janë paralajmëruar dhe denoncuar edhe në rezolutat ndërkombëtare. Tani është radha jonë të dorëzojmë provat”, përfundoi Berisha.
Protesta e 16 majit pritet të jetë një nga më të mëdhatë e këtij viti, me thirrjen për përfshirje të gjerë nga qytetarët dhe faktorët ndërkombëtarë.
