Kryeministri në detyrë i Republikës së Kosovës, Albin Kurti, priti sot në Prishtinë Presidentin e Këshillit Evropian, António Costa, i cili po zhvillon vizitën e tij të parë zyrtare në vend. Në takimin e mbajtur në ndërtesën e qeverisë, Kurti ishte i shoqëruar nga zëvendëskryeministri i parë, Besnik Bislimi, ministrja e Punëve të Jashtme, Donika Gërvalla, dhe ambasadori i Kosovës në Belgjikë, Agron Bajrami.
Gjatë takimit, kryeministri Kurti i uroi mirëseardhje zyrtarit të lartë evropian dhe theksoi përkushtimin e Kosovës për integrim në Bashkimin Evropian. “Kosova është evropiane në vlera, në histori dhe në kulturë dhe jemi plotësisht të përkushtuar për t’u bërë vend anëtar i BE-së”, deklaroi ai.
Kurti kërkoi nga Presidenti Costa një angazhim më të madh për përshpejtimin e procesit të integrimit, duke nënvizuar se kanë kaluar më shumë se dy vite e gjysmë që nga aplikimi i Kosovës për anëtarësim në BE. Ai kërkoi dërgimin e pyetësorit dhe dhënien e statusit të vendit kandidat, si dhe heqjen e menjëhershme të masave kufizuese të BE-së ndaj Kosovës.
Në vijim të takimit, kryeministri paraqiti të dhëna që tregojnë përparimin e vendit në fusha kyçe si sundimi i ligjit, lufta kundër korrupsionit dhe zhvillimi ekonomik. Ai përmendi vlerësimet pozitive nga organizata ndërkombëtare si Freedom House, Transparency International dhe World Justice Project, si dhe faktin që Kosova ka dorëzuar në kohë Agjendën e Reformave në kuadër të Planit të Rritjes të BE-së.
Një tjetër temë me rëndësi në takim ishte siguria rajonale. Kurti theksoi se Serbia vazhdon të jetë një burim kërcënimi për stabilitetin në rajon, duke përmendur sulmin paramilitar të shtatorit 2023 në Banjskë dhe lidhjet e saj me Federatën Ruse. Ai kërkoi dorëzimin e Milan Radoiçiqit autoriteteve të drejtësisë së Kosovës.
Po ashtu, kryeministri ngriti shqetësimin për gjendjen e shqiptarëve në Luginën e Preshevës. Ai denoncoi diskriminimin sistematik të tyre në punësim dhe përfaqësim institucional, duke kërkuar më shumë vëmendje dhe mbështetje ndërkombëtare për të drejtat e shqiptarëve në Preshevë, Medvegjë dhe Bujanoc.
Vizita e António Costës në Prishtinë konsiderohet një moment i rëndësishëm për marrëdhëniet Kosovë–BE dhe një mundësi për thellimin e bashkëpunimit politik dhe institucional në kuadër të aspiratave evropiane të vendit.
