Sot shënohet një muaj nga fillimi i seancës konstituive për legjislaturën e nëntë të Kuvendit të Kosovës, por ende nuk është arritur të konstituohet ky institucion. Deputetët kanë mbajtur 16 seanca që nga 15 prilli, por pa mundur të zgjidhen kryetari i Kuvendit.
Në përpjekjen e fundit, kryesuesi i seancës, Avni Dehari, tentoi të imponojë një votim për formimin e një komisioni që do të zgjedhte kryetarin përmes votës së fshehtë, por kjo metodë u kundërshtua nga partitë PDK, LDK dhe AAK.
“55 deputetë votuan për, 1 kundër, pa abstenime. Shihemi më 17 maj, ora 10:30,” tha Dehari. Lëvizja Vetëvendosje vazhdon të mbajë kandidaturën e deputetes Albulena Haxhiu për këtë pozitë, por partitë e tjera kanë deklaruar se nuk do ta mbështesin këtë propozim.
Pavarësisht nevojës për funksionalizimin e institucioneve, Kuvendi i Kosovës mbetet i paralizuar, ndërsa partitë politike ende nuk kanë arritur një marrëveshje për zgjidhjen e situatës.
