Kosova dhe vendet fqinje do të përballen sot me kushte të vështira atmosferike, ndërsa moti i ftohtë dhe i lagësht pritet të dominojë në të gjithë rajonin.
Sipas parashikimeve meteorologjike, në Kosovë sot do të mbizotërojë mot kryesisht i vranët, me reshje të dendura shiu dhe mundësi për rrebeshe të shoqëruara me vetëtima dhe bubullimë. Reshjet do të jenë të pranishme gjatë gjithë ditës, me intensitet të ndryshueshëm, duke sjellë një lehtësim të thatësisë së madhe që ka prekur vendin së fundmi.
Temperaturat do të pësojnë rënie të ndjeshme, ndërsa në zonat kodrinore dhe malore, sidomos në orët e pasdites dhe mbrëmjes, priten edhe reshje shqote dhe bore. Po ashtu, në disa zona më të ulëta të Rrafshit të Kosovës mund të regjistrohen reshje të lehta bore – një dukuri e rrallë për këtë periudhë kohore dhe që konsiderohet si ekstrem meteorologjik.
Edhe në Shqipëri, Maqedoninë e Veriut, Luginën e Preshevës dhe Malin e Zi, moti do të jetë i ngjashëm. Parashikohet të mbajë mot i vranët me reshje të dendura shiu, të shoqëruara herë pas here me rrebeshe dhe bubullima. Në veri të Malit të Zi, si dhe në zonat malore të Maqedonisë së Veriut dhe në veri e lindje të Shqipërisë, priten reshje bore, që sinjalizojnë një përkeqësim të mëtejshëm të kushteve atmosferike në këto rajone.
Meteorologët këshillojnë qytetarët të tregojnë kujdes të shtuar në qarkullim, për shkak të mundësisë për vërshime lokale dhe vështirësi në qarkullim, sidomos në zonat malore.
