Sot shënohen 26 vite nga zhdukja e Ukshin Hotit, një prej figurave më të shquara të Lëvizjes Kombëtare Shqiptare, i cili u zhduk më 16 maj 1999 në rrethana ende të paqarta. Lajmin e rikujton Gazeta Sinjali, duke vënë në dukje se fati i Hotit mbetet ende mister.
Ukshin Hoti, i lindur më 17 qershor 1943 në Krushë të Madhe të Rahovecit, ishte profesor, filozof, shkrimtar dhe patriot i devotshëm, me një kontribut të jashtëzakonshëm në përpjekjet për çlirimin dhe pavarësinë e Kosovës. Ai studioi dhe ligjëroi në disa universitete amerikane përpara se të kthehej në atdhe për t’iu bashkuar lëvizjeve atdhetare në vitet 1980-1990.
Për aktivitetin e tij politik, Hoti u përball me persekutime të vazhdueshme nga regjimi serb, fillimisht nga regjimi i Titos dhe më pas nga ai i Millosheviqit. Në vitin 1994 ai u arrestua dhe u dënua me pesë vjet burgim për “veprimtari armiqësore ndaj Jugosllavisë” dhe për pjesëmarrje aktive në lëvizjen për Republikën e Kosovës.
Më 16 maj 1999, pas përfundimit të dënimit në burgun famëkeq të Dubravës, Ukshin Hoti u lirua në mënyrë të pazakontë – një ditë e dielë, kur zakonisht nuk liroheshin të burgosur – dhe që nga ajo ditë nuk është parë më. Sipas dëshmitarëve dhe të mbijetuarve të masakrës në Dubravë, ai u largua nga ambientet e burgut nën shoqërimin e policisë serbe dhe që nga ajo kohë nuk ka asnjë informacion zyrtar për fatin e tij.
Ukshin Hoti sot konsiderohet simbol i sakrificës dhe përkushtimit kombëtar. Zhdukja e tij vazhdon të jetë një plagë e hapur për familjen, bashkëluftëtarët dhe mbarë opinionin publik shqiptar.
Apel për drejtësi dhe zbardhje të fatit të tij është përsëritur vazhdimisht ndër vite, por institucionet vendore dhe ndërkombëtare nuk kanë ofruar ende përgjigje përfundimtare.
